Në Tiranë, reshjet e dëborës janë të rralla, aq sa çdokush nga ne nxiton të fiksojë me aparat momentin kur kryeqyteti zbardhet, qoftë edhe për pak kohë.
E ndërsa sinoptikanët këtë javë parashikojnë mot të ftohtë dhe reshje dëbore në të gjithë vendin, për të parë Tiranën të mbuluar tërësisht nga reshjet e dendura, do të duhet të kthehemi pas në kohë.
Është Drejtoria e Përgjithshme e Arkivave, e cila në një status të saj ka publikuar disa fotografi të vjetra, të nxjerra nga arkivi ku duket Tirana të viteve 1939 e deri në 1941.
Në atë kohë, kryeqyteti karakterizohej nga një dimër i ashpër, dhe ku reshjet e dëborës, nuk ishin edhe aq të pazakonta. Fotografitë janë shkrepur në atë kohë, nga Instituti Kombëtar LUCE i Italisë fashiste, i cili u themelua më 1924
“Borë nga e shkuara
Instituti Kombëtar LUCE (Isituto Nazionale LUCE) i Italisë fashiste u themelua më 1924. Instituti me qendër në Romë kishte detyrë prodhimin dhe shpërndarjen e dokumentarëve dhe filmave kinematografikë. Gjatë periudhës fashiste u kthye në instrumentin kryesor të propagandës fashiste. Si në çdo mbretëri të nënshtuar ndaj kurorës së Savoiave, LUCE kishte misionin e vet edhe në Shqipëri. Nga një ditë me reshje bore, fotografët e LUCE na kanë lënë këto fotografi të dimrave të vitit 1939 dhe 1941. Foto: Fototeka e AQSh (imazhe prodhuar nga Istituto Nazionale LUCE).” sqaron në postimin e saj Drejtoria e Arkivave